„ვალუტით ვიბერებით“ - რუსეთის  ცენტრალური ბანკი რუბლის ზრდის შესაჩერებლად ქვეყნიდან კაპიტალის გადინებაზე შეზღუდვებს აუქმებს

დღეიდან რუსეთის ცენტრალური ბანკი ფედერაციის მოქალაქეებისა და მეგობარი ქვეყნებიდან არარეზიდენტი ფიზიკური პირებისთვის საზღვარგარეთ უცხოური ვალუტის გადარიცხვებზე მოქმედ შეზღუდვებს აუქმებს. ეს შეზღუდვები უკრაინის ომის დაწყებიდან მოქმედებდა. ამის შესახებ ბანკის განცხადებაში წერია, რასაც „ინტერფაქსი“ ავრცელებს. ქვეყნიდან კაპიტალის გადინებაზე მკაცრი შეზღუდვების მოხსნის მიზეზად რუბლის კურსის მატების შეჩერება სახელდება, რამაც ფედერალურ ბიუჯეტსა და ნედლეულის მსხვილ კომპანიებს პრობლემები შეუქმნა. კერძოდ, წლის დასაწყისიდან დოლარი 30%-ით, 110-დან 76 რუბლამდე, ევრო 24%-ით, ხოლო ჩინური იუანი რუბლთან მიმართებაში 22%-ით გაუფასურდა. რუბლის გამყარების მთავარი ფაქტორი საზღვარგარეთ ინვესტირების შეუძლებლობაა. ვალუტის გადარიცხვებზე რიგი შეზღუდვები ძალაში 2026 წლის 7 ივნისამდე დარჩება. კერძოდ, არამეგობრული ქვეყნებიდან რუსეთში მომუშავე არარეზიდენტ ფიზიკურ პირებს საზღვარგარეთ მათი ხელფასის ოდენობამდე თანხის გადარიცხვა შეუძლიათ. ასევე, ძალაში რჩება არამეგობრული ქვეყნებიდან რუსეთში არმომუშავე არარეზიდენტი ფიზიკური და იურიდიული პირებისთვის საზღვარგარეთ თანხის გადარიცხვის აკრძალვა. ცენტრალური ბანკის განმარტებით, ეს შეზღუდვა არ ვრცელდება რუსეთის იურიდიული ან ფიზიკური პირების მიერ კონტროლირებად უცხოურ კომპანიებზე; ასევე, არ ვრცელდება უცხოელი ინვესტორების გადარიცხვებზე, რომლებიც რუსეთის ფინანსურ ბაზარზე ინვესტირებენ. არამეგობრული ქვეყნების ბანკებს კვლავ შეუძლიათ თანხის რუბლებში გადარიცხვა რუსეთის საკრედიტო ინსტიტუტებში გახსნილ საკორესპონდენტო ანგარიშების გამოყენებით, თუ გადამხდელისა და მიმღების ანგარიშები უცხოურ ბანკებში არის გახსნილი. მოსკოვის ბირჟის სამეთვალყურეო საბჭოს თავმჯდომარე სერგეი შვეცოვის შეფასებით, რუსეთი ამჟამად „ვალუტით იბერება:“ თუ ადრე ვალუტა უბრალოდ საზღვარგარეთ გადიოდა, ახლა ის ქვეყნის შიგნით რჩება და რუბლზე ზეწოლას ახდენს, მაშინ, როცა ყველა სხვა წამყვანი ეკონომიკა ეროვნულ ვალუტას ასუსტებს, რომ ხელსაყრელი ექსპორტის პირობები უზრუნველყოს. T-Investments-ის შეფასებით, ბიუჯეტმა წელს 1 ტრლნ რუბლი (13 მლრდ დოლარი) დაკარგა გაცვლითი კურსის გამო, რომელიც მთავრობის მიერ თავდაპირველად პროგნოზირებულ დონესთან შედარებით, ამჟამად, თითქმის, 20 რუბლით (0.26 დოლარით) ნაკლებია. ამასთან, რუსი ექსპერტები არ გამორიცხავენ, რომ ცენტრალური ბანკი ევროკავშირის მიერ ფულის გათეთრების საწინააღმდეგო „შავ სიაში“ რუსეთის შეყვანაზე რეაგირებდეს, რამაც შესაძლოა, „ამ მიმართულებით ისედაც შემცირებული გადახდები კიდევ უფრო გაართულოს.“ ცნობისთვის: შეზღუდვების გაუქმებამდე, 2022 წლის 8 მარტიდან რუსეთის მოქალაქეებს საბანკო ანგარიშებით საზღვარგარეთ არაუმეტეს 1 მლნ დოლარის, ხოლო ფულადი გზავნილების სისტემებით მხოლოდ 10 000 დოლარის გადარიცხვა შეეძლოთ. სექტემბერში ბანკმა საზღვარგარეთ თანხის გადარიცხვაზე შეზღუდვები კიდევ ექვსი თვით გაახანგრძლივა, რაც 2026 წლის 31 მარტამდე უნდა ყოფილიყო ძალაში. თუმცა მაშინ რუსეთისა და მეგობარი ქვეყნების მოქალაქეების მიერ საზღვარგარეთ გადარიცხული სახსრების ლიმიტი 1 მლნ დოლარამდე გაიზარდა. მოამზადა ლადო სულაბერიძემ