ვაქცინების, სისხლისა და იმუნური შრატების ექსპორტი 149%-ით, იმპორტი კი 36.5%-ით გაიზარდა - სად ვყიდით და ვყიდულობთ

2025 წლის იანვარ-ოქტომბერში საქართველოში ვაქცინების, სისხლისა და იმუნური შრატების იმპორტი 36.5%-ით გაიზარდა, ადგილობრივმა ექსპორტმა კი 149%-ით მოიმატა. ამის შესახებ სტატისტიკის ეროვნული სამსახურის მონაცემებიდან ირკვევა. კერძოდ, 2024 წლის იანვარ-ოქტომბერში ქვეყანამ 82.025 მლნ აშშ დოლარის აღნიშნული კატეგორიის პროდუქცია შეიძინა, წელს კი ეს მაჩვენებელი 111.974 მლნ აშშ დოლარამდე გაიზარდა. „ბიზნესპრესნიუსი“ გთავაზობთ 10 მსხვილი საიმპორტო ქვეყნების ჩამონათვალს, საიდანაც საქართველოს ვაქცინა, სისხლი და იმუნური შრატები შემოაქვს: გასულ წელთან შედარებით, ლიდერი იმპორტიორი ქვეყნების ჩამონათვალი შეცვლილი არ არის. შედარებით მნიშვნელოვანი ზრდა შეინიშნება, ვაქცინების, სისხლისა და იმუნური შრატების გერმანიიდან შემოტანის ნაწილში. 2024 წლის იანვარ-ოქტომბერში, საქართველომ გერმანიიდან 2. 261 მლნ აშშ დოლარის ღირებულების აღნიშნული კატეგორიის პროდუქცია იყიდა, წელს კი ეს მაჩვენებელი 7.387 მლნ აშშ დოლარითაა გაზრდილი. რაც შეეხება ადგილობრივ ექსპორტს, აქ 149%-იანი ზრდა ფიქსირდება. კერძოდ, თუ 2024 წლის იანვარ-ოქტომბერში საქართველოდან გავიდა 6.632 მლნ დოლარის ღირებულების ვაქცინები, სისხლი და იმუნური შრატები, წელს ეს მაჩვენებელი 16.524 მლნ დოლარამდეა გაზრდილი. აღსანიშნავია, რომ წელს აღნიშნული პროდუქციის 75.5% უზბეკეთში გავიდა, მეორე ადგილზეა ბელარუსი - 2.888 მლნ დოლარით, მესამეზე კი ყაზახეთი - 630.7 ათასი დოლარით. ამასთან, 417.9 ათასი დოლარის ღირებულების ვაქცინების, სისხლის და იმუნური შრატების ექსპორტი განხორციელდა გერმანიაში. მცირე რაოდენობით გავიდა ირანში, სომხეთში, ტაჯიკეთში, გაერთიანებულ სამეფოსა და ყირგიზეთში.