უფლებებს უგულებელყოფს, უკუშედეგი მოჰყვება - სსც ფსიქიკური ჯანმრთელობის პრობლემების მქონეთა ბაზაზე

სსც-ის შეფასებით, საკანონმდებლო ცვლილებების შინაარსი ეწინააღმდეგება როგორც საერთაშორისო სტანდარტებს, ასევე, ფსიქიკური ჯანმრთელობის სფეროს ძირითად პრინციპებს. „კანონში ცვლილებები უგულებელყოფს ადამიანის უფლებებზე დაფუძნებულ მიდგომებს“, - წერს ორგანიზაცია 17 დეკემბერს გამოქვეყნებულ შეფასებაში. „ცენტრის“ თანახმად, „საკანონმდებლო ცვლილებები ადამიანებს ბლანკეტურად აჯგუფებს მათი ჯანმრთელობის პრობლემების და არა ინდივიდუალური საჭიროებების მიხედვით და მათ უფლებებით სარგებლობას ბლანკეტურადვე უზღუდავს“. „ამასთან, კანონი უფლებაში ჩარევის ინტენსივობას თვითონ არ ადგენს, შესაბამისად, ამ ეტაპზე ჯერ კიდევ არ არის ცნობილი, თუ რა კრიტერიუმების მიხედვით და რა ვადებით შეიძლება მოხვდნენ ადამიანები წინამდებარე ბაზაში“, - ვკითხულობთ განცხადებაში. „დამატებით, საკანონმდებლო ცვლილებები იყენებს ისეთ ტერმინოლოგიას, რომელიც შორსაა ადამიანის უფლებებზე დაფუძნებული მიდგომებისგან - იგი სხვადასხვა ნივთიერებების მომხმარებლებს უწოდებს „ალკოჰოლიზმით, ნარკომანიით ან/და ტოქსიკომანიით დაავადებულ“ პირებს, რაც ამ ადამიანების მიმართ სტიგმის შემცველ განწყობებს აძლიერებს“, - აცხადებს „სოციალური სამართლიანობის ცენტრი“. სსც-ში ვარაუდობენ, რომ საკანონმდებლო ცვლილებას დასახული მიზნის უკუშედეგი მოჰყვება: ორგანიზაცია მიუთითებს, რომ „კანონპროექტი შეიქმნა არაინკლუზიური პროცესის შედეგად“ და „კანონპროექტის განმარტებითი ბარათის მიხედვით, მისი შემუშავების პროცესში არ მომხდარა ექსპერტებისა თუ თემატური ორგანიზაციების ჩართულობა, ასევე, არ განხორციელებულა სხვა ქვეყნების გამოცდილების მიმოხილვა მსგავსი რეგულაციების იმპლემენტაციის მიმართულებით“.