„თუ იაფ მუშახელს ნახავს, უცხოელს დაასაქმებს - მორალი, რომ აუცილებლად ქართველი დაასაქმოს, ბიზნესისთვის არ არის მატერიალური“

„ბიზნესისთვის მორალი, რომ აუცილებლად ქართველი დაასაქმოს და არა უცხოელი, არ არის მატერიალური”, - ამის შესახებ მცირე და საშუალო საწარმოთა ასოციაციის ხელმძღვანელმა მიხეილ ჭელიძემ „პალიტრანიუსისა” და რადიო „პალიტრას” გადაცემაში „საქმე” განაცხადა. მისი თქმით, თუ უფრო იაფ მუშახელს ნახავს, ბიზნესი უცხოელს დაასაქმებს. ამასთან, მიხეილ ჭელიძემ აღნიშნა, რომ სხვა ქვეყნის მოქალაქეები ძირითადად მომსახურების სექტორის ლოჯისტიკურ ნაწილში საქმდებიან. „ბიზნესისთვის მორალი, რომ აუცილებლად ქართველი დაასაქმოს და არა უცხოელი, არ არის მატერიალური. ბიზნესისთვის მთავარია, რომ პროდუქტი შექმნას მაქსიმალურად იაფად, რათა მეტი მოგება ნახოს. ეს არის ფორმულა, რომელიც მთელ მსოფლიოში არსებობს. შესაბამისად, თუ უფრო იაფ მუშახელს ნახავს, დაასაქმებს უცხოელს. ჩვენები რატომ მიდიან?! ჩვენი მოქალაქეები უცხოური ბაზრებისთვის იაფი მუშახელია და მაგიტომ არის ჩვენზე მოთხოვნა, თორემ, იქაური რომ დაასაქმონ, გაცილებით მეტი ხელფასი უნდა გადაუხადონ. ამ პროცესში რაც არ უნდა ჩავერიოთ, ვერ [შევაჩერებთ]. რაც შეეხება საქართველოს, [უცხოელი კადრები] უფრო არიან მომსახურების სექტორის ლოჯისტიკურ („გლოვო”, „ვოლტი”) ნაწილში, ასევე ტაქსით მომსახურების სფეროში. თუმცა, გაყიდვებში,ოფისურ საქმიანობებში ნადვილად არ არის ის მოცემულობა, რომ ქართველი დასაქმებულები იჩაგრებიან”, - განაცხადა მიხეილ ჭელიძემ. ამასთან, ჭელიძემ უცხოელებისთვის სახელმწიფო ენის გამოცდის ჩაბარებასთან დაკავშირებით ისაუბრა და აღნიშნა, რომ ეს საჭიროა, რათა მინიმალური საკომუნიკაციო ენა მაინც იცოდნენ. „რა თქმა უნდა, ენა სალაპარაკო დონეზე უნდა იცოდნენ, რატომ უნდა ვესაუბრებოდე ტაქსის მძღოლს რუსულად ან იგლისურად, საქართველოში ვართ. რაღაც ვალდებულებები მათთვისაც უნდა იყოს. დასაქმების ნაწილში ისიც დევს, რომ ბიზნესმა ჯერ ადგილობრივი კადრები უნდა მოიძიოს, ხოლო თუ ვერ ნახა და საჭიროება დადგა, იმ შემთხვევაში დაასაქმოს უცხოელები”,- აღნიშნა მიხეილ ჭელიძემ.