წელს Apple სმარტფონების მიწოდებით Samsung-ს გაუსწრებს და ლიდერობას 2029 წლამდე შეინარჩუნებს

წელს ამერიკული Apple Inc გლობალური სმარტფონების მიწოდებით სამხრეთკორეულ Samsung Electronics-ს 14 წლის შემდეგ პირველად გადაუსწრებს. ამის შესახებ კომპანია Counterpoint Research-ის პროგნოზში წერია, რასაც “ინტერფაქსი” ავრცელებს. კომპანიის პროგნოზით, iPhone-ის გლობალური მიწოდება წელს 243 მლნ ერთეულს, ხოლო Samsung-ის, დაახლოებით, 235 მლნ ერთეულს მიაღწევს. ამასთან, სმარტფონების გლობალურ ბაზარზე Apple-ის წილი წლის ბოლოსთვის 19.4%-ს, ხოლო Samsung-ის წილი 18.7%-ს მიაღწევს. Apple-ის შესახებ ოპტიმისტური პროგნოზი სექტემბერში წარდგენილი iPhone 17-ის სერიის წარმატებით არის განპირობებული. მიმდინარე სადღესასწაულო სეზონზე ამ სერიის გაყიდვებს Counterpoint „გამორჩეულს“ უწოდებს. კერძოდ, iPhone 17-ის სერიის გაყიდვები მისი გამოშვებიდან პირველი ოთხი კვირის განმავლობაში 12%-ით აღემატებოდა წინა iPhone 16-ის სერიის გაყიდვებს. ჩინეთში, რომელიც Apple-ის ძირითად ბაზარს წარმოადგენს, ამ მოწყობილობების გაყიდვები იმავე პერიოდში წინა სერიის გაყიდვებს 18%-ით აღემატებოდა. კომპანიის შეფასებით, „iPhone 17-ის მიმართ ბაზრის უაღრესად დადებითი რეაქციის გარდა, ოპტიმისტური პროგნოზის მთავარი ფაქტორი მოწყობილობის განახლების ციკლში გარდამტეხი მომენტის დადგომაა. მომხმარებლები, რომლებმაც სმარტფონები კოვიდპანდემიური მოთხოვნის ბუმის დროს შეიძინეს, ამჟამად მოწყობილობების განახლების ფაზაში შედიან.“ თავის მხრივ, Samsung სხვა გამოწვევის წინაშეც დგას, რასაც ჩინელი მწარმოებლების მხრიდან ბიუჯეტურ და საშუალო სეგმენტებში გაზრდილი კონკურენცია იწვევს. ეს სამხრეთკორეული კომპანიის გაყიდვებს ზღუდავს. Counterpoint-ის ანალიტიკოსები ვარაუდობენ, რომ Apple გლობალური სმარტფონების გაყიდვებში ლიდერობას 2029 წლამდე შეინარჩუნებს. მოამზადა ლადო სულაბერიძემ