ტრამპმა მთვარეზე ბირთვული რეაქტორით ამერიკული ბაზის შექმნის ბრძანება გასცა

NASA-ს პროგრამა „არტემიდის“ ფარგლებში მთვარეზე 2030 წლისთვის მუდმივი ამერიკული ბაზა და ბირთვული რეაქტორი უნდა განლაგდეს. ამ მიზნით ტრამპის ადმინისტრაცია მომდევნო სამი წლის განმავლობაში აშშ-ის კოსმოსურ სექტორში 50 მლრდ დოლარის ინვესტიციის მიზიდვას, ხოლო 2030 წლისთვის საერთაშორისო კოსმოსური სადგურის ჩანაცვლებას გეგმავს. ამის შესახებ აშშ-ის პრეზიდენტ დონალდ ტრამპის აღმასრულებელ ბრძანებაში წერია, რომელიც თეთრი სახლის ვებგვერდზე გამოქვეყნდა. დოკუმენტის თანახმად, აშშ 2028 წლისთვის მთვარეზე უნდა დაბრუნდეს, რომ კოსმოსურ სფეროში, განსაკუთრებით, ჩინეთთან შედარებით, ქვეყნის უპირატესობა იქნეს უზრუნველყოფილი. აღმასრულებელ ბრძანებაში აღნიშნულია, რომ ამერიკული მისიის დაბრუნება მთვარის ეკონომიკური განვითარების საფუძვლის ჩასაყრელად და მარსზე მოგზაურობის მოსამზადებლად არის აუცილებელი. „არტემიდის“ პროგრამა, რომელიც ამერიკელი ასტრონავტების მთვარეზე დაბრუნებას ისახავს მიზნად, ტრამპის პირველი საპრეზიდენტო ვადის დროს, 2017 წელს დაიწყო. 2022 წელს მისი პირველი მისია, Artemis I წარმატებით დასრულდა, რომლის დროსაც კოსმოსურმა ხომალდმა მთვარეს უპილოტოდ შემოუფრინა. შემდეგი გაფრენა 2026 წელს არის დაგეგმილი, რასაც 55 წლის შემდეგ მთვარის სამხრეთ პოლუსზე ადამიანების პირველი დაშვების მისია მოჰყვება. NASA-ს სამომავლო გეგმა 2020-იანი წლების ბოლოს ან 2030-იანი წლების დასაწყისში მთვარის სადგურ Gateway-ისა და რეგულარული მისიებისთვის ინფრასტრუქტურის შექმნას ითვალისწინებს. 1968-იდან 1972 წლამდე NASA-მ პროგრამა Apollo-ს ფარგლებში მთვარეზე ცხრა ექსპედიცია გაგზავნა. მათგან ექვსმა ასტრონავტები მთვარის ზედაპირზე დასვა. თუმცა 1972 წლის შემდეგ პროგრამა ჯერ გაყინეს, შემდეგ კი დახურეს. ცნობისთვის: ჩინეთი მთვარის ათვისების ფარგლებში 2026 წელს პლანეტაზე მისია “ჩანიეს”აპარატის გაშვებას გეგმავს, რომლის მიზანიც სამხრეთ პოლუსის შესწავლაა. ასევე, 2028–2029 წლების მისიის დროს აპარატი მთვარის რესურსის მოპოვება-დამუშავების ტექნოლოგიებს დატესტავს. ჩინეთის მიზანია, მთვარეზე პილოტირებული დაშვება, დაახლოებით, 2030 წლისთვის შეასრულოს. ამ მიზნით უკვე ზემძიმე რაკეტა “ჩანჩჟენ 10,” ასევე, მრავალჯერადი კოსმოსური ხომალდი „მენჩჟოი“ და მთვარის დასაფრენი აპარატი „ლანიუე“ მუშავდება. მოამზადა ლადო სულაბერიძემ