“თებერვალში უარესი იქნება” - ზამთრის გუდაური, სამოთხე თუ ჯოჯოხეთი?

ახალი წლის დღეები გუდაურისთვის ყოველ წელს ყველაზე დატვირთული პერიოდია, რაც ყველამ წინასწარ იცის და წესით, ზამთრის სეზონს კურორტი მომზადებული უნდა ხვდებოდეს, თუმცა ის, რასაც ჩვენი რესპონდენტები ჰყვებიან, საპირისპიროზე მეტყველებს. “თუ რამეს არ შევცვლით, თებერვალში უარესი იქნება”, - ეუბნება რადიო თავისუფლებას მირანდა ესაკია, მთის კურორტების ბიზნესასოციაციის თანადამფუძნებელი. მირანდა იყო ერთ-ერთი პირველი, ვინც გუდაურის გადავსებული ნაგვის ბუნკერების და პირდაპირ გზაზე დაწყობილი ნარჩენების ფუთების ვიდეო და ახალ გუდაურამდე მისასვლელი, ჩახერგილი გზის ფოტოები გამოაქვეყნა. ახალი წლის დღეებში, სტუმრებით გადავსებული კურორტიდან ნარჩენები რამდენიმე დღე ვერ გატანეს - გაჩერებული მანქანებით ჩახერგილი გზის გამო ნაგვის მანქანებმა ურნებამდე უბრალოდ ვერ მიაღწიეს. იმ დღეებში, ვინმეს სასწრაფო დახმარების ან სახანძროს მანქანა რომ დასჭირვებოდა, ისინიც ისევე გაიჭედებოდნენ, როგორც ნაგვის მანქანები. “საბედნიეროდ, არცერთი არავის დასჭირვებია”, - გვეუბნება „ტრეფიკ თრეველის“ დამფუძნებელი ცოტნე ჯაფარიძე. მირანდა ე...