თანასოფლელს ფულს სძალავდა და ემუქრებოდა – შსს-მ მარნეულში 1 პირი დააკავა

შინაგან საქმეთა სამინისტროს ინფორმაციით, მარნეულში1987 წელს დაბადებული წარსულში ნასამართლევი, ამჟამად პირობითი მსჯავრის ქვეშ მყოფი ე.ა. ცეცხლსასროლი იარაღის გამოყენებით სისტემატურად ჩადენილი ძალადობისა და არაერთგზის გამოძალვის ბრალდებით დააკავეს. "გამოძიებით დადგინდა, რომ ბრალდებული თანასოფლელს - 1987 წელს დაბადებულ რ.ე.-ს 2025 წლის სექტემბრიდან სისტემატიურად სთხოვდა ფულს და გადაუხდელობის შემთხვევაში სიცოცხლის მოსპობით ემუქრებოდა. მუქარისა და დაშინების გზით რ.ე-მ სექტემბრიდან დღემდე, სხვადასხვა დროს ბრალდებულს ჯამში 1300 ლარი გადასცა". - წერს შსს. განცხადების თანახმად, სამართალდამცველებმა ე.ა. ბრალდებულის სახით მოსამართლის განჩინების საფუძველზე დააკავეს. გამოძიება სისხლის სამართლის კოდექსის 126-ე მუხლის მე-2 ნაწილის "მ" და 181-ე მუხლის მე-2 ნაწილის "ბ" ქვეპუნქტებით მიმდინარეობს, რაც 7 წლამდე თავისუფლების აღკვეთას ითვალისწინებს.