„სამართალი იზეიმებს... უფალი შეგვეწიოს“ - ჯანგველაძის საქმეზე დაკავებული გიორგი მიქაძე

თბილისის საქალაქო სასამართლოში მან თქვა, რომ პროკურატურის წაყენებული ბრალის შინაარსი სიმართლე არაა. „ვისი გონებაში მოიხარშა და შემდეგ განხორციელდა ეს ბრალი, იმედია გაირკვევა, თქვენო ღირსებავ, საქმის განხილვის დროს დარწმუნდებით რომ არაფერ შუაში ვარ, რაც შეეხება ცილისწამებებს, იმედი მაქვს სამართალი იზეიმებს. უფალი შეგვეწიოს“, - როგორც „TV პირველი“ აცხადებს, ამ სიტყვებით მიმართა მან მოსამართლეს. გიორგი მიქაძე პოლიციამ 2025 წლის 12 აგვისტოს დააკავა. მას აღკვეთის ღონისძიებად პატიმრობა აქვს შეფარდებული. გიორგი მიქაძის მსგავსად, შეკვეთით და ანგარებით განზრახ მკვლელობის ორგანიზებისთვის ბრალი წაყენებული აქვთ მის ძმას, დავით მიქაძესა და გიორგი ჯოხაძეს. დათუნა მიქაძე საქართველოში არ იმყოფება და მასზე ძებნაა გამოცხადებული. ლევან ჯანგველაძე თბილისის ცენტრში, ჭავჭავაძის გამზირზე 2025 წლის 14 მარტს მოკლეს. „კანონიერი ქურდის“ მერაბ ჯანგველაძის (მეტსახელად „სოხუმსკის“) ძმა მიყენებული ჭრილობებით ადგილზე გარდაიცვალა. ამავე საქმეში ბრალდებულის სტატუსი აქვს ყოფილ გენერალურ პროკურორს, ოთარ ფარცხალაძეს....