„საერთაშორისო პროექტებში დამოუკიდებელი ლაბორატორია არ მონაწილეობს - მართვის პროცესები სხვანაირად არის გაწერილი და ძალიან ბევრი შავი ხვრელია“ - ამირან მამუჭაძე

„ლაბორატორიის საკითხი არის პოზიტიური ცვლილება“ - ასე აფასებს „ბლექ სი გრუპის“ დირექტორი, ამირან მამუჭაძე „პალიტრანიუსისა“ და რადიო „პალიტრას“ გადაცემაში „საქმე“ მშენებლობის ხარისხის მაკონტროლებელი ლაბორატორიის შექმნის ინიციატივას. ცნობისთვის, ინფრასტრუქტურის სამინისტრო თბილისში ხარისხის მაკონტროლებელი ლაბორატორიის შექმნას გეგმავს. უწყების ცნობით, ახალი ლაბორატორია სამშენებლო მასალებისა და ობიექტების ხარისხის შემოწმებასა და კონტროლს უზრუნველყოფს. როგორც ამირან მამუჭაძე აღნიშნავს, მონიტორინგის ჯგუფი უკვე მომზადებულ, დამტკიცებულ და შეთანხმებულ სამუშაო პროცესს გადაამოწმებს, რაც სამშენებლო სამუშაოების ხარისხზე დადებითად აისახება. გარდა ამისა, მანვე დასძინა, რომ საერთაშორისო პროექტებში მართვის განსხვავებული მექანიზმები მოქმედებს, ამასთანავე, განსხვავდება ლაბორატორიული შემოწმების მექანიზმები და არსებობს ბევრი „შავი ხვრელი“. ამირან მამუჭაძეს მიაჩნია, რომ სამინისტროს მხრიდან მაკონტროლებელი ლაბორატორიის შექმნა, ხარისხის კუთხით არსებულ ხარვეზებს აღმოფხვრის. „სამინისტრომ შექმნა მონიტორინგის ჯგუფი, რაც ძალიან კარგია, რადგან უკვე მომზადებული, დამტკიცებული და შეთანხმებული სამუშაო პროცესის გადამოწმება ხდება. ამ გადამოწმების დროს მთელი საინჟინრო ჯგუფი ნახავს, თუ რამე გამოგვეპარა; დამატებითი რგოლი არ ნიშნავს ბიუროკრატიას. ლაბორატორიის საკითხი არის პოზიტიური ცვლილება. როდესაც საუბარია სახელმწიფო ბიუჯეტით დაფინანსებულ პროექტზე, იქ ყველაფერზე სახელმწიფო ბიუჯეტით შევთანხმდებით, მაგრამ, როდესაც პროექტი დაფინანსებულია დონორების მიერ, მართვის პროცესები სხვანაირად არის გაწერილი და იქ არის ძალიან ბევრი შავი ხვრელი. როცა ადგილობრივი ბიუჯეტიც არის ჩართული, იქ ცალსახად ხდება დამოუკიდებელი ლაბორატორიის მიერ შემოწმება, მაგრამ, როცა საერთაშორისო პროექტზეა საუბარი, იქ დამოუკიდებელი ლაბორატორია არ იღებს მონაწილეობას, იქვე კონტრაქტით განსაზღვრულია ზედამხედველი და მშენებელი, იქვე აწყობენ ლაბორატორიას და იქვე ხდება შემოწმება; ზუსტად იმ შემოწმების პროცესში ხდება დარღვევები, რადგანაც ქვეყნის მილიონობით თანხა იხარჯება 2-3 ფიზიკური პირის გადაწყვეტილების დონეზე. მონიტორინგის ჯგუფისა და ლაბორატორიის მუშაობას მე ასე ვუყურებ, რომ შეიქმნება კვლევითი ცენტრი, რომელიც ქვეყანაში შემოიტანს ინოვაციებს და გაჩნდება მაკონტროლებელი სამშენებლო მიმართულებით“, - განაცხადა ამირან მამუჭაძემ.