როდის გაიხსნება ზამთრის საკურორტო ზონებში სასრიალო ტრასები

„მთის ტრასების სააგენტოს“ (MTA) ინფორმაციით, 20 დეკემბერს, ბაკურიანში, კოხტას სასრიალო არეალი იხსნება. დიდველისა და მიტარბის სასრიალო არეალებზე კი აქტიურად მიმდინარეობს ხელოვნური გათოვლიანების სამუშაოები და ტრასების ეტაპობრივი გახსნა 27 დეკემბრიდან იგეგმება. „საბაგირო და ტრასა - კოხტა პლატო, ყოველდღე, 10:00-დან 17:00 საათამდე მიიღებს სრიალის მსურველებს“, - აღნიშნულია ინფორმაციაში. რაც შეეხება გუდაურს, მესტიასა და გოდერძის კურორტებს, საბაგიროები 27 დეკემბრიდან ჩაირთვება, ხოლო სასრიალო ტრასები, ამინდისა და თოვლის საფარის მდგომარეობის მიხედვით, ეტაპობრივად გაიხსნება. „27 დეკემბრიდან ჩაირთვება გუდაურისა და კობის საბაგიროები: პირველი, სოლიკო, გუდაურა, კობი, ფირნი და თრუსო. საბაგიროები იმუშავებს ყოველდღე, 10:00-დან 17:00 საათამდე“, - აღნიშნულია „მთის ტრასების სააგენტოს“ მიერ გავრცელებულ ინფორმაციაში.