„პანდემიამდელ პერიოდთან შედარებით, საქართველოს ეკონომიკა 59.1%-ით გაიზარდა - ამით ჩვენ ვუსწრებთ მსოფლიოს ეკონომიკის ზრდის ტემპსაც“

„მთელი წლის განმავლობაში, მეტ-ნაკლებად თანაბარი ეკონომიკური ზრდის ტემპი გვქონდა. მეტიც, ამპლიტუდის ვარდნა ფაქტობრივად, არ გვქონია“ - ასე აფასებს ეკონომისტი და სტატისტიკოსი სოსო არჩვაძე საქართველოს ეკონომიკური ზრდის მაჩვენებელს, რომელიც ბოლო თვეების განმავლობაში შემცირების ტრენდით ხასიათდება. ცნობისთვის, სტატისტიკის ეროვნული სამსახურის წინასწარი შეფასებით, 2025 წლის ოქტომბერში, წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) ზრდამ 6.0% შეადგინა, ხოლო 2025 წლის პირველი ათი თვის საშუალო მაჩვენებელი 7.6%-ით განისაზღვრა. თუ წლის განმავლობაში თვიური ეკონომიკური ზრდის ტემპს გადავხედავთ, ასეთი მოცემულობა გვაქვს: სექტემბერში ზრდა 6.4% შეადგენდა, აგვისტოში 6.6%-ს, ივლისში - 6.5%-ს, ივნისში - 6.3%-ს, მაისში - 7.5%-ს, აპრილში - 7.5%-ს, მარტში - 9%-ს, თებერვალში - 7.7%-ს, ხოლო იანვარში - 11.1%-ს. შესაბამისად, მონაცემებიდან გამოდის, რომ უკვე ოქტომბერში ქვეყანაში ეკონომიკური ზრდის ტემპი შენელდა. თუმცა, აღნიშნულს არ იზიარებს ეკონომისტი და სტატისტიკოსი სოსო არჩვაძე. როგორც ის “ბიზნესპრესნიუსთან” საუბრისას აცხადებს, ქვეყანა უსწრებს საერთაშორისო ეკონომიკური ზრდის ტემპსაც და ამასთან, მეტ-ნაკლებად თანაბარი მაჩვენებლები აქვს. “მე ვფიქრობ, ოქტომბერში 6%-იანი და 10-თვიან ჭრილში 7.6%-იანი ზრდა, ეს საკმაოდ მაღალი მაჩვენებელია, მიუხედავად იმისა, რომ საქართველო არ არის მდიდარი ბუნებრივი რესურსებით. ამასთან, საერთაშორისო მაჩვენებლებითაც, ეს ძალიან კარგი შედეგია. თუ უფრო გრძელვადიან პერიოდს ავიღებთ, მაგალითად, პანდემიამდელ პერიოდთან შედარებით, საქართველოს ეკონომიკა გაიზარდა 59.1%-ით, ანუ ჩვენ ვუსწრებთ მსოფლიო ეკონომიკურ ზრდის ტემპსაც. რაც შეეხება იანვარი მაჩვენებელს, ეს შესადარებლად არ გამოდგება, რადგან ერთი თვე, ეკონომიკური აქტივობით, ფაქტობრივად, მკვდარი თვეა. ამიტომ, შეიძლება ითქვას, რომ მთელი წლის განმავლობაში, მეტ-ნაკლებად თანაბარი ეკონომიკური ზრდის ტემპი გვქონდა. მეტიც, ამპლიტუდის ვარდნა ფაქტობრივად, არ გვქონია. მე უფრო სხვა რამეზე გავამახვილებდი ყურადღებას, მაგალითად, წელს ოქტომბერში დამოუკიდებლობის აღდგენის შემდეგ, პირველად მოხდა, რომ დაქირავებით დასაქმებულთა რაოდენობამ გადააჭარბა მილიონიან ზღვარს. ამასთან, მცირდება უმუშევრობის დონე. თუმცა, რა თქმა უნდა, რჩება გამოწვევებიც, მათ შორის, მაღალი ინფლაცია”, -ამბობს სოსო არჩვაძე.