მსოფლიოში პირველად - მარშალის კუნძულებზე მოქალაქეები სამთავრობო სოციალურ დახმარებას კრიპტოვალუტით იღებენ

მარშალის კუნძულების მთავრობამ უნივერსალური საბაზისო შემოსავლის ეროვნული პროგრამა დაიწყო. მის ფარგლებში კუნძულებზე მცხოვრები ყველა მოქალაქე კვარტალურად, დაახლოებით, 200 დოლარს ტრადიციული მეთოდის, ანუ საბანკო ანგარიშზე ნაღდი ფულის ან ჩეკის გარდა, ციფრულ საფულის გამოყენებით კრიპტოვალუტითაც იღებენ. ინფორმაციას The Guardian ავრცელებს. პირველი გადახდები ნოემბრის ბოლოს განხორციელდა და მიმღებ პირს თანხის მიღების წესის არჩევა შეეძლო. CoinDesk-ის ცნობით, მარშალის კუნძულების მთავრობა დოლართან მიბმულ სტეიბლკოინ USDM1-ს იყენებს, რომელიც აშშ-ის მოკლევადიანი სახაზინო ობლიგაციებით სრულად არის უზრუნველყოფილი. ეს ციფრული აქტივი შექმნილია, როგორც სუვერენული ციფრული ვალის ინსტრუმენტი, რომელიც ბლოკჩეინ Stellar-ზე არის გამოშვებული. ყველა, ვინც კრიპტოგადახდას ირჩევს, თანხას სამთავრობო ციფრულ საფულე Lomalo-ში იღებს, რომელიც ამ სტეიბლკოინს მხარს უჭერს. მთავრობის შეფასებით, ეს გადახდები მზარდი ხარჯისა და მოქალაქეების გადინების ფონზე „სოციალური უსაფრთხოების ბადედ“ უნდა იქცეს. პროგრამა აშშ-სთან შეთანხმებით შექმნილი სატრასტო ფონდით ფინანსდება. ამით აშშ ცდილობს, სხვა საკითხებთან ერთად, მარშალის კუნძულებს ათწლეულების განმავლობაში ამერიკული ბირთვული ტესტირების გამო კომპენსაცია გადაუხადოს. სატრასტო ფონდის აქტივები 1.3 მლრდ დოლარს შეადგენს. ამის გარდა, აშშ-მა 2027 წლის ბოლომდე დამატებით 500 მლნ დოლარის შენატანის ვალდებულება აიღო. The Guardian-ის მიერ გამოკითხული ექსპერტები ამ პროგრამას “მსოფლიოში პირველს” უწოდებენ. ისინი რესპუბლიკის ინიციატივას სოციალური უზრუნველყოფის სახელმწიფო პროგრამებში ბლოკჩეინის გამოყენების ისტორიულ ნაბიჯად აფასებენ. თუმცა შორეულ რაიონებში ინტერნეტსა და სმარტფონებზე შეზღუდული წვდომის გამო კრიპტოვალუტის ოფციას რეალურად ჯერ მცირე რაოდენობით იყენებენ. ცნობისთვის: მარშალის კუნძულები წყნარ ოკეანეში, ჰავაისა და ავსტრალიას შორის მდებარეობს, რომლის მოსახლეობაც, დაახლოებით, 42 000 მოქალაქეს შეადგენს. მოამზადა ლადო სულაბერიძემ