მომავალ წელს ჩიპების გლობალური გაყიდვები 1 ტრლნ დოლარს მიაღწევს - WSTS-ის პროგნოზი

2026 წელს ჩიპების გლობალური გაყიდვები შესაძლოა, 1 ტრლნ დოლარს მიუახლოვდეს. ამის შესახებ სექტორული ორგანიზაცია, World Semiconductor Trade Statistics (WSTS) პროგნოზირებს, რასაც “ინტერფაქსი” ავრცელებს. წელს 22.5%-იანი ზრდა არის მოსალოდნელი, რაც 772 მლრდ დოლარის გაყიდვებს ნიშნავს. ეს ივნისის პროგნოზზე, დაახლოებით, 45 მლრდ დოლარით მეტია. ამერიკისა და აზია-წყნარი ოკეანის რეგიონებში გაყიდვები, სავარაუდოდ, 25-30%-ით, ხოლო ევროპაში 6%-ით გაიზრდება, მაშინ, როცა იაპონიაში 4%-ით შემცირდება. 2026 წელს ნახევარგამტარების გლობალური ბაზარი, სავარაუდოდ, 25%-ზე მეტად გაიზრდება და 975 მლრდ დოლარს მიაღწევს. ზრდა ყველა რეგიონსა და პროდუქტის კატეგორიაში არის მოსალოდნელი. ყველაზე დიდი წილი კვლავ ამერიკისა და აზიის ბაზრებზე მოდის, ხოლო ევროპისა და იაპონიის ზრდა, დაახლოებით, 12%-ით არის პროგნოზირებული. წელს ინტეგრირებული მიკროსქემების გაყიდვები, სავარაუდოდ, 25.6%-ით, 677.85 მლრდ დოლარამდე გაიზრდება. მათ შორის, მეხსიერების ჩიპების გაყიდვები, სავარაუდოდ, 27.8%-ით, 211.6 მლრდ დოლარამდე მოიმატებს. 2026 წელს ინტეგრირებული სქემების გაყიდვები, სავარაუდოდ, 29%-ით, 874.3 მლრდ დოლარამდე გაიზრდება. მათ შორის, მეხსიერების ჩიპების სექტორში 39.4%-იანი, ანუ 294.8 მლრდ დოლარამდე ზრდა არის პროგნოზირებული. მოამზადა ლადო სულაბერიძემ