მოკლული მასწავლებლის ოჯახი მოითხოვს, პროკურატურამ გამოძიება ჯგუფური ძალადობის მუხლით გააგრძელოს

ავალიანის ოჯახის წევრებმა და ადვოკატებმა დღეს, 22 დეკემბერს, პროკურატურასთან გამართული აქციისას მოუწოდეს საგამოძიებო უწყებას, „გადააკვალიფიციროს“ საქმე, ანუ შეცვალოს გამოძიების მუხლი. როგორც ადვოკატმა ზაზა ხატიაშვილმა და დაღუპულის დედამ, ეკა კუპატაძემ განაცხადეს, მათი მოთხოვნაა, „დააკავონ ყველა, ვინც ჩართული იყო 28 წლის მასწავლებლის ანგარიშსწორებაში“, - რასაც მისი ჯერ კომაში ჩავარდნა, შემდეგ გარდაცვალება მოჰყვა. ოჯახი ასევე ითხოვს, მიეცეს საქმის მასალების გაცნობის შესაძლებლობა. მოთხოვნების დაუკმაყოფილებლობის შემთხვევაში ოჯახის წევრები ამბობენ, რომ მიმართავენ სხვა ზომებსაც, თუმცა რას, ჯერ არ აზუსტებენ. ოქტომბერში ძალადობის შემდეგ გარდაცვლილი, ახალგაზრდა მასწავლებლის, გიგა ავალიანის საქმეზე დამატებით ორი არასრულწლოვანი 20 დეკემბერს დააკავეს. მანამდე ოჯახი დაკავებულთა წრის გაფართოებას ითხოვდა. „მიუხედავად იმისა, რომ დაკავებულებისთვის ცნობილი იყო, მძიმე დანაშაულის მომზადების და ჩადენის შესახებ, მომხდარი დანაშაულის თაობაზე სამართალდამცველებს არ შეატყობინეს“, - განაცხადეს პროკურატურაში...