„კომპანია, რომელსაც არ აჯარიმებ, მიჩვეულია რომ „გაახალტუროს“ ვალდებულებები“ - ბიზნესი ენერგოსექტორის ფინანსურ ამნისტიაზე

„იმ სპეკულანტი „ინვესტორებისგან“, რომლებიც ფურცლებით დადიან, ეძებენ და ვერ პოულობენ, დაცული იქნება სახელმწიფო“, - ასე აფასებს მცირე და საშუალო ჰესების ასოციაციის ხელმძღვანელი გიორგი მარგებაძე ენერგოსექტორისთვის ფინანსური ამნისტიის გამოცხადებას. როგორც მან „პალიტრანიუსისა“ და რადიო „პალიტრას“ გადაცემაში „საქმე“ განაცხადა, ყველა პროექტის დეტალური შემოწმება რთული პროცესია, შესაბამისად, სწორი მიდგომაა, რომ ახალი გადაცდომის შემთხვევაში კომპანიას წინა დარღვევების ჯარიმებიც აღუდგება. „ეს მიდგომა, გარდა იმ ფინანსური ნაწილისა, რაც შეღავათი იქნება კომპანიებისთვის, სწორი და ლოგიკურია. აქამდე, ვიცით რომ კომპანიებს, რომლებიც მოღვაწეობენ ენერგოსექტორში, სახელმწიფო ჯარიმებს არ აკისრებდა და ყოველთვის ხდებოდა, გადავადება თუ დამატებითი დროის მიცემა. იმის აღსრულება, რომ ჯარიმა გადაეხადა კომპანიებს, არ ხდებოდა. შესაბამისად, მთელი ამ პერიოდის განმავლობაში ყველა მიჩვეული იყო იმას, რომ პირობითად, თუ ვადას დაარღვევდა, სახელმწიფო არ აჯარიმებდა. ახალი ხელმძღვანელობა, რომელიც მოვიდა, ძალიან მკაცრად უდგება ამ ყველაფერს და ეს სწორია, იმიტომ, რომ კომპანია, რომელსაც არ აჯარიმებ, მიჩვეულია რომ „გაახალტუროს“ საკუთარი ვალდებულებები სახელმწიფოს წინაშე. როცა ჯარიმების აღსრულება დააპირეს, დადგა დეველოპერების მხრიდან სწორი შენიშვნა და წუხილი, რომ კი ბატონო, მკაცრად მიუდგებით, მაგრამ ის პერიოდი, როცა ჩვენ არავინ გვაჯარიმებდა, დღეს რატომ უნდა აღასრულოთ?! ჯარიმების პროცესი ორად იყოფა და შევეცდები აგიხსნათ. როდესაც შენ მემორანდუმს აფორმებ სახელმწიფოსთან და ვალდებულება გაქვს პირობითად მაქსიმუმ 15 თვეში ჩაატარო კვლევები და წარუდგინო სახელმწიფოს, თუმცა, ეს 15 თვის მერე კი არ უნდა გააკეთო, არამედ კვარტალურად გაქვს ვალდებულება, რომ სახელმწიფოს წარუდგინო დოკუმენტაცია, ტოპოგრაფია, გეოლოგია, ეკოლოგიის კვლევა და ა.შ. არის შემთხვევები, როდესაც კომპანიები პატიოსნად შრომობენ, საკმაოდ სოლიდურ თანხებს ხარჯავენ, კეთილსინდისიერად იქცევიან (დაახლოებით, ნახევარი მილიონი დოლარის კვლევებია გასაკეთებელი), თუმცა არის ზოგჯერ ბუნებრივი პირობები... მაგალითად, გაზაფხულის თვეებში ტოპოგრაფია თუ უნდა დაიწყო, შეიძლება მდინარე ისეთი ადიდებული იყოს, უბრალოდ ხეობაში ვერ შედიოდე; ან თუნდაც, დიზაინი დაამთავრო, მეორე განხილვა რომ გექნება, იქ შეიძლება მოსახლეობა აღმოჩნდეს ისეთი, ვინც პირველ განხილვაზე არ იყო, მეორეს დაესწრო და გეუბნება, აქ ჩემი მიწაა და მილს ნუ გაატარებ, მოდი ცოტა გვერდზე გაატარე. შესაბამისად, გიწევს დიზაინის შეცვლა, თავიდან დაწყება გეოლოგიის, თავიდან დაწყება დიზაინური სამუშაოების. ასეთ დროს ვადების გადაცილება არსებობს და ეს არის ბუნებრივი. ამის შემდეგ, ასეთი შემთხვევები თუ იქნება, ენერგეტიკის დეპარტამენტი საკმაოდ კვალიფიციური ხალხით არის დაკომპლექტებული და დეტალურად გაივლიან ამ ყველაფერს. თუ საპატიო იქნება, გეპატიება მსგავსი გადავადება, ოღონდ წინასწარ დასაბუთებული უნდა იყოს. თუმცა, მეორეს მხრივ არიან კომპანიები, რომლებიც მემორანდუმებს აფორმებენ იმიტომ, რომ შემდეგ ამ ფურცლით წავიდნენ ივაჭრონ, ვიღაც ინვესტორი იპოვონ. შესაბამისად, ეს ადამიანები, ამ კვლევების პროცესში, ამ ნახევარ მილიონს არ ხარჯავენ ან ხარჯავენ ისე, რომ სწორად არ იკვლევენ. იციან, რომ არ დააჯარიმებს სახელმწიფო და ასე ვაჭრობენ ამ ფურცლებით. შედეგად, კარგი პროექტები არის დაბევებული. ამათ ჩვენ ვეძახით არაკეთილსინდისიერ, სპეკულანტ „ინვესტორებს“. დარწმუნებული ვარ, რომ აბსოლუტურად სწორია მსგავსი მიდგომა და სიმკაცრე, როცა ვისაც მთავრობასთან ვალდებულება აქვს აღებული და არ ასრულებს, სანქციები დაეკისროს. შედეგად, იმ სპეკულანტი „ინვესტორებისგან“, რომლებიც ფურცლებით დადიან, ეძებენ ინვესტორებს და ვერ პოულობენ, რადგან თამასა აქვთ ძალიან მაღალი, სახელმწიფო დაცული იქნება. თუმცა, ეს რთული პროცესია, 15 000 მეგავატში ყველაფერს რომ დეტალურად გაჰყვე, ძალიან დიდ დროს წაიღებს. შესაბამისად, ძალიან სწორი გადაწყვეტილება მიიღეს, რომ მოდით, რადგან დღეს ასეთი მიდგომით ვართ, ახლა ყველას გეპატიებათ, მაგრამ უკვე დღეიდან, ვისაც რა გადაცდენა ექნებათ, ის ჯარიმა კი არა რომელიც ამ მომენტში გეკუთვნის, ძველსაც გაგიხსენებ. ეს სწორი მიდგომაა“, - განაცხადა გიორგი მარგებაძემ. შეგახსენებთ, რომ მთავრობის გადაწყვეტილებით, ენერგეტიკის სექტორში მოქმედ ყველა კომპანიას, კონკრეტული დათქმით, სახელმწიფოს წინაშე დაგროვილი, ჯამში 1 მლრდ ლარის მოცულობის ჯარიმა ჩამოეწერება. რაც შეეხება დათქმას, კობახიძის თქმით, „კომპანიებს განახლებული ვადების დარღვევის შემთხვევაში, სრულად დაეკისრებათ ახლადდაგროვილი პირგასამტეხლოს და ჯარიმის გადახდის ვალდებულება და აღუდგებათ ნაპატიები ჯარიმებიც“.