კამჩატკის ნახევარკუნძულზე ბოლო 30 წლის მანძილზე ყველაზე ძლიერი დიდთოვლობაა

კამჩატკის ნახევარკუნძული ბოლო 30 წლის განმავლობაში ერთ-ერთ ყველაზე ძლიერ დიდთოვლობას ებრძვის. რადიო თავისუფლების რუსულენოვანი სამსახურის ცნობით, პეტროპავლოვსკ-კამჩატკიში თოვლის საფარმა ზოგ ადგილას სამსართულიანი სახლების სიმაღლეს მიაღწია, რის შედეგადაც საცხოვრებელი კორპუსების სადარბაზოები და პირველი სართულების ფანჯრები მთლიანად ჩაიხერგა. ქალაქში საგანგებო მდგომარეობა მას შემდეგ გამოცხადდა, რაც 16 იანვარს სახურავებიდან ჩამოშლილი თოვლის მასების შედეგად ორი ადამიანი დაიღუპა. გავრცელებული ინფორმაციით, სტიქიამ ქალაქის ინფრასტრუქტურის პარალიზება გამოიწვია, ხოლო სასწრაფო დახმარების ეკიპაჟები ვერ აღწევდნენ რთულად მისადგომ უბნებში, რის გამოც ერთ-ერთი დაზარალებული დაგვიანებული დახმარების გამო გარდაიცვალა. ადგილობრივები უკმაყოფილებას გამოთქვამენ როგორც სინოპტიკოსების პროგნოზების უზუსტობის, ისე საგანგებო სამსახურების არაეფექტური მუშაობის გამო. მათი თქმით, გაფრთხილებები სტიქიის რეალურ მასშტაბს არ შეესაბამებოდა, ხოლო მაშველებისა და ტექნიკის რესურსი აშკარად არასაკმარისი აღმოჩნდა მთელი ქალაქისთვის....