ინდოეთის საგარეო: უკრაინაში საომრად რუსულ ჯარში 202 ინდოელი გაიწვიეს

ინდოეთის საგარეო საქმეთა სამინისტროს თქმით, 2022 წლიდან რუსეთის არმიაში სულ მცირე 202 ინდოეთის მოქალაქე გაიწვიეს. ინდოეთის პარლამენტის ზედა პალატის 18 დეკემბერს წარდგენილ ოფიციალურ ანგარიშში ასახულია, რომ რუსულ ჯარში მომსახურე ინდოელთაგან 26 დაიღუპა, ხოლო შვიდი უგზო-უკვლოდ დაკარგულად ითვლება. ინდოეთის ხელისუფლების თქმით, მთავრობის ძალისხმევის შედეგად, 119 ინდოეთის მოქალაქე სამხედრო სამსახურიდან ვადაზე ადრე გათავისუფლდა, თუმცა ამ დროისთვის რუსეთის შეიარაღებულ ძალებში კიდევ 50 ინდოელი რჩება. "ინდოეთის მთავრობა მუდმივად თანამშრომლობს რუსულ მხარესთან, რათა რუსეთის შეიარაღებულ ძალებში მყოფი ყველა ინდოეთის მოქალაქის უსაფრთხოება, კეთილდღეობა და ვადაზე ადრე გათავისუფლება უზრუნველყოს"- ნათქვამია ინდოეთის საგარეო საქმეთა სამინისტროს განცხადებაში. The Kyiv Independent-ის შეფასებით, აღნიშნული შემთხვევა რუსეთის მიერ უცხო ქვეყნის მოქალაქეების მასშტაბური რეკრუტირების კიდევ ერთ მტკიცებულებას წარმოადგენს.