„გიდებზე მოთხოვნის შემცირებას არ ველოდებით, პირიქით, ტურისტული ნაკადიდან გამომდინარე, შესაძლოა, დეფიციტიც კი იყოს“ - ასოციაცია

„გიდების ნაწილში მოთხოვნის შემცირება არ უნდა იყოს, პირიქით, ტურისტული ნაკადიდან გამომდინარე, შესაძლოა, დეფიციტიც კი იყოს“, - ამის შესახებ „ბიზნესპრესნიუსთან“ საქართველოს ტურიზმის სფეროში დასაქმებულთა პროფესიული კავშირის თავმჯდომარემ, გიორგი თეთრაძემ განაცხადა. როგორც მანვე აღნიშნა, იმ შემთხვევაში, თუ ზამთრის კურორტებზე თოვლი იქნება, სეზონზე ტურისტების დიდ ნაკად ელოდებიან. „ზაფხულის ტურისტული სეზონი საკმაოდ წარმატებული იყო, იმედია ზამთრის სეზონიც ასეთი იქნება და ამინდი ხელს შეგვიწყობს, ბუნებრივია, თუ თოვლი არ მოვიდა, ჩავარდება სეზონი. ნოემბრის ბოლოდან დეკემბრის ბოლომდე სეზონებს შორის პერიოდია და ტურისტული ნაკადი კლებას იწყებს ხოლმე, მაგრამ დეკემბრის ბოლოდან, როცა ზამთრის კურორტებზე უკვე თოვლია, ნაკადი კვლავ იზრდება. გუდაურში თოვლი არის უკვე. პირადად მე მოცლა არ მაქვს, ყველა რეკავს და აინტერესებს, არის თუ არა თოვლი, შეიძლება თუ არა უკვე ჩამოსვლა და თხილამურებით სრიალი. დაახლოებით დეკემბრის ბოლოს იხსნება ხოლმე ზამთრის სეზონი. ველოდებით ტურისტების დიდ ნაკადს, განსაკუთრებით ისრაელიდან და არაბული ქვეყნებიდან, მათ, ვისთვისაც თოვლი უცხოა და ეგზოტიკაა. თუ ამინდებმა ხელი შეგვიწყო და თოვლი უფრო ადრე მოვიდა, ველოდებით ტურისტების ისეთივე ნაკადს, როგორიც ზაფხულში იყო. თუ ტურისტი მეტი იქნება, მოთხოვნაც მეტი იქნება გიდებზე. განსაკუთრებით ამ დროს აქტიურდებიან სამთო გამყოლები და სათხილამურო გიდები, რომლებიც ადგილზე არიან და კონსულტაციას უწევენ ჩამოსულ ტურისტს. მოთხოვნის შემცირება არ უნდა იყოს, პირიქით, ამინდიდან და ტურისტული ნაკადიდან გამომდინარე, შესაძლოა, დეფიციტიც კი იყოს“, - განაცხადა „ბიზნესპრესნიუსთან“ გიორგი თეთრაძემ.