Duty Free-ს, რომელიც ქვეყნის სასაზღვრო ზოლში არ მდებარეობს, საქმიანობის გაგრძელების შესაძლებლობა 2028 წლის 1-ელ იანვრამდე გაუგრძელდება

Duty Free-ს, რომელიც ქვეყნის სასაზღვრო ზოლში არ მდებარეობს, საქმიანობის გაგრძელების შესაძლებლობა 2028 წლის 1-ელ იანვრამდე გაუგრძელდება - ამის შესახებ ცვლილება „საქართველოს საბაჟო კოდექსში“ შედის, რომელიც საფინანსო-საბიუჯეტო კომიტეტმა გამარტივებული წესით განიხილა. როგორც მომხსენებელმა, ეკონომიკური პოლიტიკის კომიტეტის თავმჯდომარემ შოთა ბერეკაშვილმა განაცხადა, მოქმედი კანონმდებლობით, თავისუფალი ვაჭრობის პუნქტმა, რომელიც არ მდებარეობს სასაზღვრო ზოლში, საქმიანობა შესაძლებელია 2026 წლის 1 იანვრამდე განახორციელოს. „მსგავსი თავისუფალი ვაჭრობის პუნქტები ფუნქციონირებდა თბილისსა და ბათუმში, თუმცა დღეის მდგომარეობით, მოქმედია მხოლოდ თბილისის პუნქტი. შესაბამისად, იმისათვის, რომ აღნიშნულ პუნქტს შეუნარჩუნდეს შესაძლებლობა საქონლის რეალიზების განხორციელებაზე უცხოეთის დიპლომატიურ და მათთან გათანაბრებულ წარმომადგენლობებზე (ასევე, მათთან მცხოვრებ ოჯახის წევრებზე), მიზანშეწონილია აღნიშნული ვადის 2028 წლის 1 იანვრამდე გაგრძელება“, - აღნიშნა შოთა ბერეკაშვილმა. კანონპროექტის ავტორები და ინიციატორები არიან საქართველოს პარლამენტის წევრები: გიორგი ბარვენაშვილი, ლევან მაჭავარიანი, ირაკლი მეზურნიშვილი, ანტონ ობოლაშვილი, მარიამ ლაშხი და შოთა ბერეკაშვილი.