დონალდ ტრამპი მედიაში გავრცელებულ ინფორმაციაზე, რომ ირანი 26 წლის დემონსტრანტს სიკვდილით აღარ დასჯის - ეს კარგი ამბავია

ეს კარგი ამბავია, - ასე ეხმაურება აშშ-ის პრეზიდენტი, დონალდ ტრამპი მედიაში გავრცელებულ ინფორმაციას იმის შესახებ, რომ ირანი საპროტესტო აქციებზე დაკავებულ 26 წლის დემონსტრანტს, ერფან სოლტანის სიკვდილით აღარ დასჯის. დონალდ ტრამპმა სოციალურ ქსელში Fox News-ის ციტირება მოახდინა, თუმცა კონკრეტული სტატიის ბმული არ გაუზიარებია. „Fox News: „პრეზიდენტ ტრამპის გაფრთხილებების შემდეგ ირანელ დემონსტრანტს სიკვდილით აღარ დასჯიან. ასევე, სხვებსაც“. ეს კარგი ამბავია. იმედია ეს გაგრძელდება“, - წერს ტრამპი Truth Social-ზე. შეგახსენებთ, დღეს ირანის სასამართლომ განაცხადა, რომ ერფან სოლტანის ბრალი წაუყენეს „ქვეყნის შიდა უსაფრთხოების წინააღმდეგ შეთქმულებისა და რეჟიმის წინააღმდეგ პროპაგანდული საქმიანობისთვის“, რაც სიკვდილით დასჯას არ ითვალისწინებს.