ბერლინში აშშ-უკრაინის მოლაპარაკების გაგრძელებამდე უიტკოფი პროგრესზე საუბრობს

გერმანიის დედაქალაქ ბერლინში დღეს, 15 დეკემბერს გაგრძელდება აშშ-უკრაინის მოლაპარაკება სამშვიდობო გეგმაზე, რომელსაც ომის დასასრულებლად უკრაინას და რუსეთს სთავაზობს პრეზიდენტ ტრამპის ადმინისტრაცია. 14 დეკემბერს ბერლინში ხუთ საათზე მეტხანს გაგრძელდა აშშ-ის პრეზიდენტის სპეციალური წარგზავნილის, სტივენ უიტკოფის, ტრამპის სიძისა და მრჩევლის, ჯარედ კუშნერის, უკრაინის პრეზიდენტ ვოლოდიმირ ზელენსკისა და ორი ქვეყნის დელეგაციების შეხვედრა. შეხვედრას ესწრებოდა გერმანიის კანცლერი ფრიდრიხ მერციც. შეხვედრის დასრულების შემდეგ, გვიან ღამით, სოციალურ ქსელ X-ში უიტკოფის ოფიციალურ გვერდზე გამოქვეყნდა ინფორმაცია, რომ ღრმა დისკუსია ჰქონდათ 20-პუნქტიან გეგმაზე, ეკონომიკურ საკითხებსა და ბევრ სხვა თემაზე და მიღწეულია „დიდი პროგრესი“. Reuters-ის და Financial Times-ის წყაროთა ცნობით, ზელენსკის ერთ-ერთი წინადადება იყო ნატოში გაწევრებაზე უკრაინის უარი, თუ დასავლეთის სახელმწიფოები უკრაინას მისცემენ ჩრდილოატლანტიკური ალიანსის ხელშეკრულების მეხუთე პუნქტის - კოლექტიური თავდაცვის ანალოგიურ უსაფრთხოების გარანტიებს. დღე...