აშშ-მა სანქციები დაუწესა ჰააგის მოსამართლე გოჩა ლორთქიფანიძეს „ისრაელის არალეგიტიმურად მიზანში ამოღების გამო“

მასთან ერთად სანქციები დაუწესეს მოსამართლეს მონღოლეთიდან, ერდენბალსურენ დამდინს. „ეს პირები პირდაპირ მონაწილეობდნენ სისხლის სამართლის საერთაშორისო სასამართლოს მიერ ისრაელის მოქალაქეების გამოძიების, დაპატიმრების, დაკავების ან სისხლისსამართლებრივი დევნის მცდელობებში ისრაელის თანხმობის გარეშე“, - განაცხადა დღეს, 18 დეკემბერს აშშ-ის სახელმწიფო მდივანმა მარკო რუბიომ. რუბიოს განცხადებითვე, ჰააგის სასამართლო „აგრძელებს ისრაელის წინააღმდეგ მიმართულ პოლიტიზებულ ქმედებებს, რაც საშიშ პრეცედენტს ქმნის ყველა ერისთვის“. „ჩვენ არ შევეგუებით სისხლის სამართლის საერთაშორისო სასამართლოს მიერ ძალაუფლების ბოროტად გამოყენებას, რაც არღვევს შეერთებული შტატებისა და ისრაელის სუვერენიტეტს და არასწორად აქვემდებარებს აშშ-სა და ისრაელის მოქალაქეებს სისხლის სამართლის საერთაშორისო სასამართლოს იურისდიქციას“, - განაცხადა სახელმწიფო მდივანმა.