აშშ-ის ხაზინამ ”ლუკოილის” უცხოური აქტივების მთავარი პრეტენდენტის შეთავაზება უარყო

აშშ-ის ხაზინის დეპარტამენტის უცხოური აქტივების კონტროლის ოფისმა (OFAC) რუსული ნავთობკომპანია “ლუკოილის” უცხოური აქტივების შესყიდვაზე ამერიკულ ბანკ Xtellus Partners-ის წინადადება უარყო და მასზე ლიცენზიას არ გასცემს. ინფორმაციას Reuters წყაროებზე დაყრდნობით ავრცელებს. სწორედ Xtellus Partners იყო, რომლისკენაც „ლუკოილი“ ათეულ სხვა პრეტენდენტს შორის იხრებოდა, რადგან ამერიკულმა ბანკმა კომპანიას უნაღდო ტრანზაქცია შესთავაზა. კერძოდ, „ლუკოილში“ ამერიკელი ინვესტორების კუთვნილი ფასიანი ქაღალდები რუსული კომპანიის საერთაშორისო აქტივებზე უნდა გაცვლილიყო. “ლუკოილისთვის” ეს ხელსაყრელი განსაკუთრებით იმიტომ იყო, რომ უნაღდო აქტივების გაცვლით თავის აქციებს იბრუნებდა, მაშინ, როცა უცხოური განყოფილების გაყიდვის შემთხვევაში მიღებული შემოსავალი სანქციების მოხსნამდე გაეყინება. ამასთან, Xtellus-ისთან გარიგება „ლუკოილის“ აქციონერთა ინფორმაციის გამჟღავნებას, ასევე, როგორც აშშ-ის ხაზინის დეპარტამენტის, ისე პუტინის მხრიდან თანხმობას მოითხოვდა. აღსანიშნავია, რომ აქციებზე აქტივების გაცვლის ეს სქემა აშშ-ის ხაზინას Xtellus-მა საფეხბურთო კლუბ “ჩელსის“ თანამფლობელ ტოდ ბოელისა და არაბთა გაერთიანებულ საემიროების საინვესტიციო ფონდ Allied Investment Partners-ის სახელით შესთავაზა. კერძოდ, ამ წინადადებით, უცხოური აქტივების სანაცვლოდ „ლუკოილს“ უნდა დაბრუნებოდა ამერიკული საინვესტიციო ფონდების აქციები, როგორიც არის BlackRock-ის, JP Morgan-ის, Goldman Sachs-ისა და სხვების საკუთრებაში არსებული აქციები. მას შემდეგ, რაც უკრაინაში ომის დაწყების შემდეგ რუსული აქციებით ვაჭრობა შეჩერდა, საინვესტიციო ფონდები იძულებული გახდნენ, ჯერ გაეყინათ ისინი, შემდეგ კი მათი მილიარდობით დოლარის ღირებულება ჩამოეწერათ. გარიგების შემთხვევაში Xtellus-ს „ლუკოილის“ აქტივების შემდგომ დაინტერესებული ენერგეტიკული კომპანიებისთვის უნდა მიეყიდა. ცნობისთვის: ლიცენზიის გაცემაზე ეს აშშ-ის ხაზინის უკვე მეორე უარია: ნოემბრის დასაწყისში OFAC-მა საერთაშორისო ნავთობტრეიდერ Gunvor-ს “ლუკოილის” უცხოური აქტივების შეძენის ნებართვა არ მისცა. ხაზინის მაშინდელ განცხადებაში Gunvor-ი “კრემლის მარიონეტად” იყო მოხსენიებული და ეწერა, რომ “ის ოპერირებისა და მოგების მისაღებად ლიცენზიას არასდროს მიიღებდა.“ ნავთობტრეიდერი Gunvor 1997 წელს შვედმა ბიზნესმენმა, ტორბიორნ ტერნკვისტმა და პუტინთან დაახლოებულმა მილიარდერმა, გენადი ტიმჩენკომ დააარსეს. ცნობილი გახდა ისიც, რომ „ლუკოილმა“ თავისი საერთაშორისო აქტივების გაყიდვაში დასახმარებლად დონალდ ტრამპის 2024 წლის საპრეზიდენტო კამპანიის უფროსი მრჩეველი, ბრაიან ლანზა დაიქირავა. მისი კომპანიის, Mercury Public Affairs-ის ვებგვერდზე წერია, რომ ლანზა ტრამპის პირველი საპრეზიდენტო კამპანიის დროს მედიასთან ურთიერთობის დირექტორის მოადგილე იყო, ხოლო 2024 წლის საარჩევნო კამპანიის დროს, ასევე, ორ ადმინისტრაციას შორის გარდამავალ პერიოდში მედიასთან ურთიერთობებს კურირებდა. ლანზა თავის კომპანიასთან ერთად „ლუკოილში“ ბოლო რამდენიმე კვირაა, მუშაობს, რამაც შედეგი უკვე გამოიღო. კერძოდ, მათ წვლილი შეიტანეს აშშ-ის ხაზინის დეპარტამენტის გადაწყვეტილებაში, რომ აქტივების გაყიდვის ვადა 13 დეკემბრიდან 17 იანვრამდე გახანგრძლივებულიყო. მოამზადა ლადო სულაბერიძემ