აეროპორტში წესრიგს არღვევდა - შსს-მ გერმანიის მოქალაქე საქართველოდან გააძევა

შსს-ს განცხადებით, გერმანიის მოქალაქე, 1998 წელს დაბადებული ბ.მ. დააკავეს და საქართველოდან გააძევეს. უწყების ცნობით, მან თბილისის აეროპორტში საზოგადოებრივი წესრიგი დაარღვია და პოლიციელებს სიტყვიერი შეურაცხყოფა მიაყენა. "7 იანვარს აღნიშნული პირი თბილისის საერთაშორისო აეროპორტში ყოფნისას გახდა აგრესიული, უხეშად არღვევდა საზოგადოებრივ წესრიგს და საპატრულო პოლიციის თანამშრომლებს სიტყვიერი შეურაცხყოფა მიაყენა მაშინ, როცა მას საზოგადოებრივი წესრიგის დაცვისკენ მოუწოდეს, რასაც ბ.მ-ს ადმინისტრაციული წესით დაკავება მოჰყვა. თბილისის საქალაქო სასამართლომ ის სამართალდამრღვევად ცნო ადმინისტრაციულ სამართალდარღვევათა კოდექსის 173-ე და 166-ე მუხლებით. მას ადმინისტრაციული სახდელის სახით დაეკისრა ჯარიმა 4 000 ლარის ოდენობით, ასევე, ქვეყნიდან გაძევება და საქართველოში შემოსვლაზე აკრძალვა 3 წლის ვადით". - წერია შსს-ს განცხადებაში.