2026 წლიდან მიწის სისტემური რეგისტრაციის პროგრამა უქმდება. თუმცა, 1 წლით ანუ 2027 წლის 1-ელ იანვრამდე მოქალაქეები თვითნებურად დაკავებული მიწის ნაკვეთების დარეგისტრირებას სპორადული წესით შეძლებენ. ამის შესახებ იუსტიციის მინისტრის მოადგილემ გიორგი დგებუაძემ სოფლის მეურნეობის კომიტეტის სხდომაზე განაცხადა. მისივე განმარტებით, მიწის რეგისტრაციის რეფორმის ფარგლებში ნაკვეთების რეგისტრაცია სისტემური და სპორადული წესით ხორციელდება. სპორადული წესით რეგისტრაცია მოქალაქეების მხრიდან წარდგენილი განცხადებების საფუძველზე მიმდინარეობს და გარკვეული საფასური არის გადასახდელი. ხოლო სისტემური წესით რეგისტრაციის პროცესი შესაბამის გეოგრაფიულ არეალში პროაქტიულად და სისტემურად მოპოვებული ინფორმაციის საფუძველზე წარიმართება და ყველა მომსახურება მოქალაქეებს საცხოვრებელ ადგილზე მიეწოდება. ამ შემთხვევაში ყველანაირი ინფორმაციის მოძიება საჯარო რეესტრის სააგენტოს მიერ ხდება და მომსახურება არის უფასო. ამასთან, როგორც სოფლის მეურნეობის კომიტეტის სხდომაზე საქართველოს იუსტიციის მინისტრის მოადგილემ გიორგი დგებუაძემ განაცხადა, იმ პირთათვის, რომელთა მიწის რეგისტრაციის საქმეზეც საჯარო რეესტრში საქმის წარმოება ცვლილების ამოქმედებამდე ანუ 2026 წლის იანვრამდე იქნება დაწყებული, უძრავი ქონება დღეს მოქმედი წესით დაურეგისტრირდებათ. „ცვლილების ამოქმედებამდე საჯარო რეესტრში მიმდინარე წარმოებები და წარდგენილი განცხადებების განხილვა, დასრულდება ცვლილების ამოქმედებამდე დადგენილი წესით. ეს ნიშნავს იმას რომ მოქალაქეებმა თუ განცხადება შეიტანეს 2026 წლის 1-ელ იანვრამდე, განხილვა გაგრძელდება იმავე წესით, რაც მოქმედებს დღეის მდგომარეობით,“ - განაცხადა გიორგი დგებუაძემ. ამასთან, იუსტიციის მინისტრის მოადგილის თქმით, მთავრობა დადგენილებით განსაზღვრავს 2026 წლის განმავლობაში, მიწის სპორადული წესით რეგისტრაციის საფასურს. „მთავრობა იუსტიციის მინისტრის წარდგინებით 2026 წლის 1-ელ იანვრამდე დადგენილებით განსაზღვრავს სპორადული რეგისტრაციისთვის დადგენილი წესით წარდგენილი განცხადების საფუძველზე საკუთრების უფლების აღიარების და სარეგისტრაციო მომსახურების საფასურს, რომელიც არ უნდა აღემატებოდეს დღეს მოქმედი კანონით დადგენილი მომსახურების უმაღლესი ოდენობის ორმაგ ოდენობას,“ - აღნიშნა დგებუაძემ.