„ეს არის ბლეფი და სისტემური პრობლემებიდან ყურადღების გადატანა“,- ასე ეხმაურება იურისტი და Niauri&Co,LLC-ს გენერალური დირექტორი ბადრი ნიაური სამშენებლო ზედამხედველობის მიმართულებით გამოცხადებულ ტენდერებში მონაწილე 11 კომპანიის მიმართ მოკვლევის დაწყებას. შეგახსენებთ, რომ მოკვლევა კონკურენციისა და მომხმარებლის დაცვის სააგენტომ (GCCA) დაიწყო. GCCA-ის ინფორმაციით, საქმე ეხება 2022-2025 წლებში გამოცხადებულ ტენდერებში სავარაუდო შეთანხმებული ქმედებების ფაქტებს. როგორც ბადრი ნიაურმა „ბიზნესპრესნიუსთან“ საუბრისას აღნიშნა, პრობლემა სხვა რამეშია, ხარვეზი არის სისტემური. „როგორც ჩანს სამშენებლო კომპანიებს ყველას ერთიანად ვერ აღკვეთავენ, ვერ დაიჭერენ და ჩამოახრჩობენ უტრირებულად რომ ვთქვათ, ამიტომ ახლა უნდა ვიპოვოთ სხვა დამნაშავე. ახლა უსულო საგნებიდან სულიერ საგნებზე გადაერთნენ და ეძებენ სხვა დამნაშავეებს. ეს დამნაშავეები, როგორც ჩანს, მათ წარმოდგენაში არიან საზედამხედველო კომპანიები. კომპანიები, რომლებიც არ ახდენდნენ დროულ გავლენას ამა თუ იმ პროექტზე. სინამდვილეში, პრობლემა სხვა რამეშია. ეს არის ჩაკეტილი წრე. წარმოიდგინეთ, სახელმწიფო ანუ შემსყიდველი აცხადებს ტენდერს, ტენდერი ცხადდება პროექტის საფუძველზე, შემდგომ იქ იმარჯვებს კომპანია და ამის პარალელურად, ასევე ტენდერით ვლინდება საზედამხედველო კომპანიაც. აქ არის ურთიერთდამოკიდებულება. ყველაზე კარგ შემთხვევაში, როდესაც ურთიერთდამოკიდებული პირები არიან ეს ორი, თვალს ხუჭავენ ერთმანეთის საქმიანობის ხარვეზებზე. ყველაზე ცუდ შემთხვევაში კი ჩვენთვის ნაცნობ და ავადსახსენებელ კორუფციას აქვს ადგილი. ამ შემთხვევაში, სადაც ზედამხედველები უბრალოდ არაკეთილსინდისიერად და არაჯეროვნად ასრულებენ ამ სამუშაოებს. ახლა კონკურენციის სააგენტოს მიერ ამ საკითხის შესწავლა ქმედით ნაბიჯებს უახლოეს 1 კვირაში, 1 თვეში თუ 1 წელიწადში არ გამოიწვევს. ხარვეზი არის სისტემური. როგორც უკვე გითხარით, ხშირ შემთხვევაში საზედამხედველო კომპანიების და სამშენებლო კომპანიების ინტერესები არის თანმხვედრი. სამწუხაროდ, უმეტეს შემთხვევაში, არაკვალიფიციურიც. აქედან გამომდინარე, სატენდერო პირობები უნდა გამოცხადდეს ისეთი, რომ იყოს მეტად კონკურენტუნარიანი. კონკურენციის სააგენტომ შეიძლება მაქსიმუმ გამოავლინოს, რომ 11 კომპანიიდან 4-5 ინაწილებდა ბაზარს. რას ნიშნავს ეს?! - როცა თქვენ შეხვალთ რომელიღაც ტენდერში და მე პირობას დავდებ თქვენს წინაშე, რომ არ ვიქნები თქვენი კონკურენტი. მონაწილეობას მივიღებ სხვა ტენდერში. მაგრამ ეს არის ბაზრის განაწილება და არანაირად არ მოქმედებს იმ ჩაკეტილ სისტემაზე, არაჯეროვნებაზე თუ იმ არაკეთილსინდისიერებაზე, რასაც ამ კომპანიებისგან შეიძლება ჰქონდეს ადგილი. ამიტომ ვამბობ, რომ ეს არის ყურადღების გადატანა და ბლეფი. თითქოს დაწყებული ქარიშხალი ჭიქაში {ბრძოლა კორუფციასთან}, რაღაც ახალი ინიციატივებით გრძელდება და მიდის ბრძოლა რაღაცასთან, ოღონდ ეს რაღაც რა არის თავად გააზრებული არ აქვთ“, - განაცხადა ბადრი ნიაურმა.